မန္တလေးမြို့၊ အမရပူရမြို့နယ်ရှိ ကမ္ဘာကျော် ဦးပိန်တံတားရှိရာ တောင်သမန်အင်း အနောက်ဘက်ပတ်လမ်းတွင် သွားလာနေသည့် စစ်ကားတစ်စီး ယနေ့ (စက်တင်ဘာ ၅) မွန်းတည့်ချိန်ခန့်က တိုက်ခိုက်ခံရပြီး ပေါက်ကွဲမှုဖြစ်ပွားသဖြင့် စစ်သားနှစ်ဦး ဒဏ်ရာရခဲ့ကြောင်း မျက်မြင်တွေ့ရှိသူတစ်ဦးက အတည်ပြုသည်။
“ဖြစ်တဲ့နေရာမှာက ဒီကနေ့ အသွားအလာ အရမ်းများနေတာ။ ရတနာ့ဂူနတ်ပွဲသွားတဲ့ လူတွေနဲ့ စည်နေတာ။ အဲ့ဒီမှာ သွားနေတဲ့ စစ်ကားပေါ်ကို ဗုံးနဲ့ ပစ်သွားတာ၊ အသံကတော့ တော်တော်ကျယ်တယ်၊ ဘယ်လိုဗုံးမျိုးလဲတော့ မသိဘူး။ ကွဲတဲ့အသံကြားတာနဲ့ ကျွန်တော်တို့ အနီးအနားရှိတဲ့လူတွေ ဆိုင်ကယ်တွေမောင်းပြေးကြ၊ အိမ်ထဲ ပြေးဝင်ကြ လုပ်ကြရတာ”ဟု ၎င်းက ပြောသည်။
တိုက်ခိုက်ခံရသည့် စစ်ကားမှာ မီးလောင်ပေါက်ကွဲခြင်း မရှိကြောင်း၊ စစ်ကားဖြတ်သွားရာ နေရာအနီးတွင် ဆိုင်ကယ်တစ်စီး မီးလောင်နေသည်ကို တွေ့ရကြောင်းလည်း ထိုသူ့ထံမှ သိရသည်။
ပေါက်ကွဲမှုဖြစ်ပြီး များမကြာမီတွင် စစ်ကောင်စီတပ်ဖွဲ့ဝင်များရောက်လာကာ ဒဏ်ရာရ စစ်သည်နှစ်ဦးကို လူနာတင်ယာဉ်ဖြင့် ခေါ်ဆောင်သွားပြီးနောက် လမ်းများကို ပိတ်ဆို့စစ်ဆေးမှုများ လုပ်ခဲ့သော်လည်း ဖမ်းဆီးခံရသူ တစ်ဦးတစ်ယောက်မျှမရှိကြောင်း အထက်ပါ မျက်မြင်သက်သေက ဆက်ပြောသည်။
ပေါက်ကွဲမှုမှာ မည်သူ့လက်ချက်ဖြစ်သည်နှင့် ဒဏ်ရာရ စစ်သားနှစ်ဦး၏ အသေးစိတ်အခြေအနေတို့ကို မျက်မြင်များက အတည်မပြုနိုင်သလို စစ်ကောင်စီထံမှလည်း မှတ်ချက်တောင်းခံနိုင်ခြင်း မရှိသေးပါ။
ငြိမ်းချမ်းစွာ ဆန္ဒပြသည်ကိုပင် ပစ်ခတ်ဖြိုခွင်းသည်အထိ ပြုမူသည့် စစ်တပ်ကို တုံ့ပြန်ရန် PDF အချို့ ဖွဲ့စည်းလာပြီးနောက် ဇွန်လခန့်မှစ၍ စစ်ကောင်စီယန္တရားကို ပစ်မှတ်ထားသည့် တိုက်ခိုက်မှုများ မန္တလေးတွင် မကြာခဏ ပေါ်ပေါက်နေသည်။
သို့သော် ရွှေ့လျားသွားလာနေသည့် စစ်ယာဉ်တန်းကို တိုက်ခိုက်မှုမှာ မန္တလေးမြို့တွင် ယခုတစ်ကြိမ်သည် ပထမဆုံးဖြစ်သည်။
(လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့အကူအညီကို လိုအပ်နေပါတယ်။ ဒီနေရာကိုနှိပ်၍ လှူဒါန်းနိုင်ပါတယ်။)
Donate here > https://www.userroll.com/site/register/m1f6pe